Grande suceso do campamento de verán do BM Ribadosar
Vinte rapaces e raparigas desfrutaron co balonmán no
campamento que o Ribadosar organizou no Pavillón do Restollal entre 1 e 8 de
setembro.
Seis xornadas de xogo, convivio e aprendizaxe souberon a
pouco, mais foron suficientes para facer acordar entre a rapazada que se
aproximou do pavillón do Restollal a lembranza ou a cobiza do balonmán.
Inmediatamente antes de comezar os adestramentos das sete
equipas federadas e as Xornadas de Portas Abertas con que o BM Ribadosar dá
inicio á temporada 2026-2027 no Pavillón Quiroga Palacios, os adestradores
Quique Iglesias e Laura Garabal, asistidos por até sete deportistas das
categorías cadete e xuvenil do clube compostelano, acompañaron nas mañás destes
primeiros días de setembro os 20 rapaces e rapazas de entre 6 e 14 anos que
participaron nesta actividade lúdico-formativa en volta do balommán.
Para alén de axudar na conciliación familiar, esta
iniciativa consolídase como cita anual de referencia para as familias que
procuran alternativas aos deportes masificados e desexan facer parte dunha
comunidade acolledora construída ao redor do balonmán. Tamén, e sobre todo, o
campamento de verán do Ribadosar contribui decisivamente para dar a coñecer a
máis familias tanto este deporte como o clube que o sustenta en Compostela. A
dedicación de adestradores e do persoal voluntario evidencia en cada edición
que a atención e os cuidados prestados ás crianzas é unha maisvalía e unha
característica que identifica o único clube de balonmán de Compostela.
Dous elementos destacan nesta nova edición do campamento de verán do BM Ribadosar. Por un lado, que a presenza feminina é cada vez maior entre a mocidade que quere desfrutar co balonmán (40% de persoas inscritas no campamento deste ano eran nenas). Por outro lado, que o balonmán é xa unha opción para os máis miúdos, como demostra que metade dos deportistas nesta edición eran benxamíns, isto é, tiñan entre 6 e 9 anos de idade.
A actividade contou coa colaboración de Deportes Caneda,
que para alén do 20% de desconto que aplica en todos os produtos das súas
tendas ás persoas asociadas tamén agasallou cun vale de 10€ a todos os
participantes no campamento; así como de Froitas A Picaraña, que cedeu fruita
de temporada para a merenda de toda a rapazada en todas as xornadas do
campamento. A este apoio privado hai que somar o apoio institucional con que
habitualmente conta o BM Ribadosar, procedente da concellaría de deportes do
Concello de Santiago de Compostela, da Deputación da Coruña, da Xunta de
Galicia e da Federación Galega de Balonmán.
