Tres deportistas do Ribadosar acudirán aos adestramentos dos Grupos de Detección e Desenvolvemento de Talentos Deportivos da Federación Galega de Balonmán.

É un orgullo para o noso clube comunicar a selección de Manuel, Noa e Rodrigo, deportistas da categoría infantil do Ribadosar, para os adestramentos dos Grupos de Detección e Desenvolvemento de Talentos Deportivos da Federación Galega de Balonmán.

Estes adestramentos terán lugar domingo día 24 de setembro en Carballo e teñen como obxectivo identificar e acompañar a traxectoria de deportistas que demostran neste momento suficiente potencial como para poderen participar en futuras convocatorias da Selección Galega de Balonmán.

Desde o Ribadosar felicitamos a nosa xogadora e xogadores, e animamos a todos/as os/as deportistas do clube a continuar nesta liña de traballo, esforzo e magnífico desempeño.

Asocíate ao Club Balonmán Ribadosar!

Os ingresos por cotas de socios/as do Club Balonmán Ribadosar supoñen neste momento menos de 5% do orzamento necesario para manter a actividade deportiva na temporada 2023-2024 (campamentos, escolas, torneos, adestramentos, competicións, ...). O obxectivo fixado pola actual Xunta Directiva é duplicar esta percentaxe nos próximos tres anos. Para iso é imprescindíbel a continuidade de todas as persoas actualmente asociadas e o apoio na captación activa de novos socios e socias de toda a comunidade do CB Ribadosar.

O noso clube necesita aumentar a masa social e para isso precisa do envolvemento de toda a xente, tamén de deportistas e familiares, porque canto maior for o corpo asociativo do Ribadosar, maior solvencia económica teremos para facilitar que os nenos e as nenas xoguen ao balonmán en Compostela. Canto maior for a nosa masa asociativa, maior tamén será o interese do clube para os eventuais patrocinios e máis serán os beneficios que daí se derivarán para as persoas asociadas, xa que continuarán viaxando aos partidos de maneira gratuita como até o de agora (até completar aforo do autobús), mais tamén desfrutarán de máis descontos nas compras ou nos servizos contratados nas entidades patrocinadoras do Ribadosar (como acontece coas viaxes, en Revimedic ou Amancio Deportes).

Como socio/a contribues:

Ao fomento do balonmán en Compostela

Á solvencia económica do CB Ribadosar

Á atracción de patrocinios

Desfrutas de viaxes gratuitas coa equipa

Dispós de descontos nos produtos ou servizos contratados cos patrocinadores do Ribadosar

Asocía máis unha persoa ao Ribadosar, e se ti aínda non es socio/a, preenche este formulario e ingresa 20€ na conta do clube (IBAN: ES04 0182 6104 1902 0151 6545). Isto pode ser feito mediante:

1. Transferencia bancaria (física ou electrónica) desde a propia entidade.

2. Ingreso en efectivo nun caixeiro BBVA.

É obrigatorio indicar no conceito: Nome, apelidos e DNI da persoa asociada.

3. Despois é preciso enviar o xustificante do ingreso (fotografado ou escaneado) para: tesouraria@ribadosar.onmicrosoft.com

Calquera dúbida ou incidencia pode ser consultada e/ou resolvida nese mesmo enderezo de correo.

As prestacións e beneficios deste tipo de contribucións están descritos en:

 https://sites.google.com/site/ribadosar/apoiantes

Clara mellora no xogo e primeira vitoria para o Ribadosar na xornada de 16 de setembro

O resultado non acompañou o esforzo da equipa infantil do Ribadosar no encontro disputado na mañá do sábado 16 de setembro no Pavillón Quiroga Palacios contra o BM Culleredo. O inicio do xogo evidenciou a superioridade dos visitantes, perante a cal pouco puido facer a equipa do bairro de Conxo, que acusou os nervos producidos pola falta de experiencia que ten aínda un conxunto formado na inmensa maioría por xogadores debutantes nesta categoría.

Con todo, os infantís do Ribadosar conseguiron asentarse aos poucos no partido e comezaron a dar mostras de seguranza sobre a pista. Se ben chegou ao intervalo cun resultado desfavorábel de 5 a 19, a equipa de Quique Iglesias deixou moi boas sensacións na segunda parte do encontro, cando conseguiu asentar a defensa e se manter imbatida durante 9 minutos. Apesar de non ter sido posíbel reverter a superioridade do Culleredo e da contundencia do resultado, esta defensa férrea, dura e sen fisuras, armada con moitas axudas e co esforzo partillado de todo o grupo, xuntamente con grandes intervencións dos porteiros, evidencia que co traballo, esforzo e espírito de loita e sacrificio demostrado na pista este sábado, os infantís do Ribadosar teñen moito a dicir na Temporada Prata que se iniciará no próximo mes de outubro.

Os cadetes, por seu lado, viaxaron a Culleredo para se enfrontaren á equipa local nunha xornada en que o resultado tampouco acompañou os rapaces de Paula Díaz. Após unha primeira parte magnífica, en que apesar de ter concluído 3 golos por abaixo do BM Culleredo (14-11) se fixo evidente unha clara melloría en relación co partido da xornada pasada, a equipa cadete do Ribadosar notou os problemas causados por un esquema de defensa 3-3 e, sobre todo, pola falta de fundo físico derivada do escaso número de adestramento realizados até o momento. Este cansazo foi evidente no último cuarto do xogo e explica en boa medida o resultado final dun encontro que, aínda así, deu para ver as enormes potencialidades deste grupo de rapaces, a maioría dos cales son infantís de segundo ano a tomaren agora contacto por primeira vez con esta nova categoría.

A única vitoria da xornada veu da man da equipa xuvenil masculina do Ribadosar, que enfrontou no Pavillón do Restollal na mañá do sábado 16 de setembro o BM Abegondo. Custou aos locais se meteren no xogo no inicio, con varias perdas de bola en ataque e desaxustamentos en defensa, que foron revisando ao longo da primeira parte, até se poren por diante no minuto 18 de partido e chegaren ao intervalo 4 golos acima no marcador.

Un inicio dubitativo do Ribadosar no segundo tempo e o acerto do Abegondo desde os 7 metros reduciu a avantaxe dos locais a apenas 2-3 golos, mais despois de axustar a defensa e resolver as dificultades colocadas pola seriedade defensiva do Abegondo, a equipa dirixida no seu debut por Aarón Nieto deixou o marcador no 32-26 final, conseguiu que os dous pontos ficasen na casa e que a afección estexa ilusionada e espectante á espera do inicio da competición oficial en outubro.

Parabéns para os clubes Abegondo e Culleredo, e felicitacións tamén para os deportistas do Ribadosar polo desempeño nesta recta final da pré-temporada.

Xornada de esforzo e aprendizaxe para o Club Balonmán Ribadosar

 

No sábado 9 de setembro as equipas das categorías infantil, cadete e xuvenil do Ribadosar xogaron os seus encontros da Pretemporada Prata como preparación para a competición oficial que terá inicio en outubro.

A equipa infantil xogou o seu primeiro partido de pré-temporada no Pavillón Valle Inclán de Oleiros, às 11 horas, contra o Balonmán Atlántico. A equipa local demostrou ter maior experiencia na competición e máis horas de adestramento, e foi xusta vencedora perante un Ribadosar formado maioritariamente por deportistas infantís de primeiro ano, reforzado para esta ocasión con tres xogadores da equipa alevín. Para a inmensa maioría dos xogadores composteláns, esta era a primeira experiencia neste formato de xogo, despois de a temporada pasada ter xogado a balonmán 5, a media pista e con catro tempos de oito minutos. A pesar de ser a súa primeira experiencia nesta modalidade de competición, o Ribadosar infantil demostrou na pista unha forte unidade e cohesión interna, o adestrador Alejandro Hermida aproveitou para testar varias posicións e estratexias de xogo cos miúdos, e a equipa nunca baixou os brazos perante un rival que mereceu claramente a vitoria.

Por súa vez, os cadetes do Ribadosar tamén comezaron a competición na Pretemporada Prata nesta xornada de sábado. Neste caso, o Pavillón Quiroga Palacios de Santiago acolleu ás 12h o encontro co Club Balonmán Culleredo, digno vencedor deste enfrontamento. O Ribadosar, que chegou ao intervalo cinco golos por baixo e conseguiu chegar a se situar apenas un golo por trás, viu como o paso dos minutos impactaba en forma de lesións de dous dos seus xogadores ou no cansanzo derivado dos aínda poucos adestramentos. Unha equipa moi nova, esta de cadetes, dirixida este ano por Paula Díaz Areán e reforzada con un grupo de infantís de segundo ano, que todo indica dará grandes alegrías á afición do clube compostelán.

A equipa xuvenil enfrontouse no Pavillón da Gándara de Narón a La Salmantina Balonmán Narón ás 12:15h. Se o primeiro xogo dos xuvenís do Ribadosar, celebrado no Restollal no día 2 de setembro contra o Club Balonmán Culleredo (concluído con un resultado de 25 a 31) demostrou a calidade e a capacidade de esforzo e sacrificio deste grupo, este segundo encontro en Narón contribuiu para reforzar esta sensación. O Ribadosar, dirixido outra vez desde o banco por Quique Iglesias, chegou ao intervalo perdendo unicamente por un golo e discutiu até o final un partido que finalizou con un marcador de 30 a 21. Moi boas sensacións na pista as producidas por esta equipa de nova factura, integrada tamén por vários cadetes, a quen de certeza acompañarán os resultados unha vez que poidan contar con aqueles xogadores que aínda non se incorporaron á equipa por causa das lesións e cando vaian acumulando adestramentos.

Felicitacións para os deportistas do Ribadosar e tamén os nosos sinceros parabéns para os clubes Atlántico, Culleredo e Narón.

Aarón Nieto, novo adestrador da categoría xuvenil do Ribadosar

Ligado ao Balonmán Pabellón Ourense como xogador durante vinte anos e como adestrador desde hai máis dunha década, Aarón Nieto coloca agora ao servizo do Ribadosar a súa dilatada experiencia na formación de deportistas en todas as categorías (de infantil até senior, masculino e feminino).

Con esta fichaxe, o Ribadosar completa a nómina de adestradores e adestradoras para as equipas actualmente inscritas en competición, con Abraham Álvarez Diz como responsábel da categoría de benxamín misto, Laura Garabal Couselo ao cargo da equipa de alevín misto, Enrique Iglesias Otero como adestrador da equipa infantil masculina e responsábel da coordenación deportiva do clube, Paula Díaz Areán como adestradora dos cadetes e Aarón Nieto a frente dos xuvenís.

Damos as boas-vindas a Aarón ao balonmán de Compostela.

Stand do Ribadosar nas Festas de Conxo

 
O Club Balonmán Ribadosar continúa coa campaña de visibilización e achegamento do Balonmán á cidadanía de Compostela. Inmediatamente despois de ter concluído con grande éxito o Campus Deportivo Gratuito realizado no Pavillón do Restollal entre 4 e 8 de setembro, o Ribadosar marca agora presenza nas Festas de San Serapio, en Conxo, no domingo día 10 de setembro, desde as 13 horas, cun stand en que os nenos e nenas presentes tiveron a ocasión de xogar a balonmán contando coa atención e as indicacións do persoal deportivo do clube.

O Ribadosar, que xoga como local os encontros das súas categorías de base no Pavillón Quiroga Palacios, evidencia desta maneira a súa estreita ligazón co bairro onde naceu en 2012, festexando coa viciñanza como máis un axente activo da comunidade local que o acolle.

Porque somos o balonmán de Compostela.

Grande participación no Campus Deportivo gratuito do Club Balonmán Ribadosar

 No ámbito das Escolas de Balonmán que desde 2012 mantén en funcionamento o Ribadosar, o Pavillón do Restollal (Rúa de Emilio e Manuel, nº3, Santiago de Compostela) acolle nas mañás de 4 a 8 de setembro, de 10h a 14h, un campamento dirixido á infancia e a mocidade de Santiago de Compostela con interese na práctica do balonmán.

Superadas as prazas inicialmente estabelecidas pola organización, este Campus Deportivo totalmente gratuito xunta nesa primeira semana de setembro máis de medio centenar de nenos e nenas de entre 6 e 16 anos, dos cales case sesenta por cento son rapaces e raparigas (case un cuarto das persoas inscritas) sen ligazón previa co clube e que se aproximan agora do balonmán por primeira vez.

Tal como foi apontado polo presidente do Ribadosar na entrevista realizada para o programa Ser Deportivos, da Cadena Ser, no día 24 de agosto de 2023 (https://cadenaser.com/audio/ser_galicia_serdeportivossantiago_20230824_152000_160000/; desde o minuto 27), 

este campus deportivo ten como “obxectivo fundamental promover o balonmán en Santiago, porque nós somos o único clube de balonmán en Santiago de Compostela, [...] e o que nos interesa é educar através do balonmán e que toda a xente da comarca nos teña presentes”.