Balanzo da temporada 2023-2024 do CB Ribadosar

 

O último semestre de 2023 no CB Ribasosar caracterizouse por un intenso labor nos planos administrativo, económico, comunicativo e deportivo. As varias actividades organizadas neste período estiveron destinadas a consolidar a estrutura do clube e expandir a práctica do balonmán en Compostela e comarca.

Xa en 2024, para alén de encher un autobús de persoas asociadas e deportistas do clube para asistir ao partido das seleccións da España e da Serbia celebrado o día 8 de maio en Lalín, o Ribadosar organizou as súas xornadas de Portas abertas (de 13 a 31 de maio) e iniciou tamén os contactos cos centros de ensino da comarca de Compostela para preparar os varios obradoiros de iniciación ao balonmán no próximo curso. Durante o mes de setembro de 2024 serán abertos novamente os adestramentos das tardes a todas as persoas que desexen experimentar a práctica deste deporte.

En maio tamén coñecemos o resultado do sorteo dunha noite no aloxamento rural convocado polo Ribadosar en parcería coa Casa da Eiriña, e iniciamos o proceso destinado á contratación de adestradores/as para atender as equipas previstas para a temporada 2024-2025, en que tencionamos continuar competindo nas categorías actuais (benxamín e alevín misto; infantil, cadete e xuvenil masculino) e alargar a participación do Ribadosar en competición oficial a infantil feminino e senior masculino (para isto último o clube colabora coa área de deportes da Universidade de Santiago de Compostela). Este mes de maio concluiu coa celebración do Festival de fin de temporada no Pavillón Quiroga Palacios, con partidos de exibición entre deportistas e familiares.

O día 10 de xuño marcamos presenza nas xornadas de “Aplicación nas entidades deportivas galegas do Protocolo de Protección de Nenos, Nenas e Adolescentes fronte á Violencia no Deporte” e criamos no clube a figura da persoa Delegada de Protección.

O último evento da temporada 2023-2024 do Ribadosar foi axendado para a tarde de 21 de xuño, momento en que o clube celebra na Nave de Vidán a súa asemblea xeral ordinaria.

Para alén disto, nesta temporada verificouse un importante reforzo da presenza do Ribadosar nos medios de comunicación e nas redes sociais, con vídeos de instagran que atinxiron millares de visualizacións e centenas de gostos, e varias entrevistas e reportaxes radiofónicas.

[carrega na imaxe para escuitar o áudio]

No plano deportivo, na temporada 2023-2024 destacan especialmente os magníficos resultados das equipas benxamín e alevíns, ficando ambas vencedoras absolutas na competición das súas zonas e gañando os benxamíns o subcampionato Prata (sexta posición na categoría no conxunto da Galiza) e atixindo os alevíns a terceira posición de todos os clubes galegos da súa categoría.

As outras tres equipas con que competiu esta temporada o CB Ribadosar (infantil, cadete e xuvenil masculinas) desputaron tanto a liga regular, na segunda división galega, como a Copa Federación. A equipa infantil, a máis numerosa do Ribadosar en 2023-2024, atinxiu a sétima posición do seu grupo na primeira fase e a cuarta na segunda. A equipa de cadetes, por seu lado, estivo composta por metade de deportistas infantís de segundo ano e ficou na sexta posición do seu grupo na primeira fase e de terceiro na segunda (clasificándose finalmente na posición número 15 da súa categoría). Xa os xuvenís, que competían sistematicamente reforzados con xogadores procedentes de cadetes, conseguiron unha meritoria oitava posición na primeira fase, ficando segundos na segunda fase (clasificándose finalmente na posición número 16 no conxunto da súa categoría).

O CB Ribadosar inicia en setembro os adestramentos das súas equipas federadas para a temporada 2024-2025.

Non esperes máis. Únete ao Ribadosar! Participa na consolidación e expansión deste proxecto deportivo e comunitario para Santiago e comarca.

Somos o balonmán en Compostela!

Convocatoria de Asemblea Xeral Ordinaria do Club Balonmán Ribadosar (21/06/2024)

 

 

De acordo o artigo 17 dos seus estatutos, convoco pola presente a todas as persoas asociadas ao Club Balonmán Ribadosar á asemblea ordinaria do clube que terá lugar no Restaurante A Nave de Vidán (Av. da Mestra Victoria Míguez, 44, 15706 Santiago de Compostela) a próxima sexta feira (venres), día 21 de xuño de 2024, ás 18 horas en primeira convocatoria e ás 18:30 horas en segunda convocatoria coa seguinte orde do día:

1. Aprobación, se proceder, das actas das asembleas (ordinaria e extraordinarias) anteriores

2. Informe da presidencia

3. Aprobación, se proceder, do informe económico da tempada 2023-2024

4. Información sobre a proposta de orzamento previsto para a tempada 2024-2025

5. Aprobación, se proceder, da proposta da directiva de conferir a distinción de socios honorarios a Gregorio Vendrell e José Ricardo Vázquez, presidentes do Club Balonmán Ribadosar entre 2012 e 2023

6. Asuntos varios

7. Rogos e preguntas

En Santiago de Compostela, a 10 de xuño de 2024.

Asdo. Roberto Samartim

(presidente)

Documentación para a asemblea:

Acta da asemblea ordinaria de 26/06/2023

Acta da asemblea extraordinaria de 26/06/2023

Acta da asemblea extraordinaria de 07/10/2023

Informe económico 2023-2024

Orzamento previsto 2024-2025 (será apresentado na asemblea)

Despois da asemblea serán servidos uns petiscos. Para participar é imprescindíbel inscrición previa através do seguinte formulario antes das 12 horas de 14 de xuño de 2024.

 

Inscrito no Rexistro Municipal de Asociacións de Santiago de Compostela nº 591 (NIF: G70327655)
Avda. de Bilbao nº 12 – 3ºA. – 15706 Santiago de Compostela (Galiza)
e-mail: ribadosar@gmail.com web: www.ribadosar.es

O CB Ribadosar consegue o subcampionato Benxamín Prata e o terceiro posto Alevín Ouro na temporada 2023-2024

O Ribadosar foi o único clube que meteu dúas equipas na fase Final4 do campionato galego alevín e benxamín celebrado o pasado sábado 1 de xuño no Lalín Arena.

O único clube de balonmán da capital galega voltou para Santiago cos trofeus que o acreditan como Subcampión Benxamín Prata e Terceiro Clasificado Alevín Ouro nesta temporada 2023-2024 en que celebra os doce da súa fundación.

FINAL 4 BENXAMÍN PRATA:

• 1º Clasificado: Maco Electricidade Bueu Atl. Bm «A»
• 2º Clasificado: CB Ribadosar
• 3º Clasificado: Carnes do Ribeiro Ourense Provincia Termal
• 4º Clasificado: Cisne Bm. José Covelo

FINAL 4 ALEVÍN OURO:

• 1º Clasificado: Construcciones OLS Rasoeiro Bm.
• 2º Clasificado: Asmubal Meaño «B»
• 3º Clasificado: CB Ribadosar
• 4º Clasificado: Club Balonmán Miño

Tras a vitoria nun partido moi desputado fronte ao Cisne Balonmán José Covelo, que só puido ser resolvido na prórroga por 5 golos a favor da equipa compostelana e 4 da pontevedresa, o CB Ribadosar benxamín non conseguiu superar na vibrante Final Prata o Atlético Balonmán Bueu. Apesar de competir en Lalín con varias baixas en relación co seu combinado habitual, o Ribadosar conseguiu a segunda posición da súa categoría e mostrou nesta fase final un bon xogo colectivo e unha grande deportividade, cualidades que dan boa conta tanto do altísimo nível atinxido como dos valores de cooperación e solidariedade transmitidos ás crianzas que sustentan a base do balonmán en Compostela.

O CB Ribadosar alevín, por seu lado, desputou o dereito a xogar pola primeira posición da categoría co Asmubal Meaño, nun partido que concluiría finalmente cun marcador de 7 a 9 e varias exclusións de dous minutos para a equipa do Salnés. A emoción e o xogo limpo voltaron no encontro polo terceiro e cuarto posto, que enfrentou o CB Ribadosar co Miño Balonmán e deixou un marcador final de 11 a 9  a favor da equipa santiaguesa.

O Ribadosar parabeniza os clubes participantes nesta fase final e se orgulla do desempeño e da deportividade mostrada polas súas equipas benxamín e alevín tanto na liga regular como na Final 4 do balonmán galego nesta temporada 2023-2024.

O Club Balonmán Ribadosar sitúa dúas equipas entre as mellores da Galiza

Benxamíns e alevíns competirán pola primeira posición nas fases finais do balonmán galego na mañá do sábado 1 de xuño en Lalín

 

Despois de se proclamaren vencedores absolutos da súa zona nas súas respectivas ligas regulares, con 18 puntos de avantaxe sobre o segundo clasificado no caso dos benxamíns e a unha distancia de 33 puntos no caso dos alevíns, as equipas destas dúas categorías do Club Balonmán Ribadosar gañaron a súa clasificación para a fase final galega na segunda fase eliminatoria desputada no Pavillón Manuel Coto Ferreiro da Estrada no pasado 17 de maio.

O magnífico desempeño dos rapaces e raparigas da canteira do Club Balonmán Ribadosar vén coroar unha temporada en que o único clube de balonmán de Santiago de Compostela competiu tamén con solvencia na Liga Prata e na Copa Federación nas categorías infantil misto e cadete e xuvenil masculino.

 

Éxitos deportivos da canteira do Ribadosar

Na intensa xornada de balonmán realizada no pavillón estradense, os benxamíns do clube santiagués perderon o seu primeiro partido da temporada contra o Cisne Carlos Casares, a quen conseguiron superar apenas no último dos cuartos do encontro. Aínda que esta derrota impediu o Ribadosar benxamín se clasificar para a fase final Ouro e se colocar así entre os catro mellores da súa categoría do balonmán galego, no segundo partido da xornada os benxamín do único clube de balonmán da capital galega si lograron superar na prórroga o Academia EIS Balonmán Tui. Con esta vitoria o Ribadosar benxamín situouse entre os 5 e os 8 mellores equipos galegos deste ano e xogará a fase final Prata o día 1 de xuño ás 10 horas no Lalín Arena, onde desputará co Cisne Balonmám José Covelo o pase ao partido final que dá acceso ao cuarto posto da categoría.

Os alevíns do Ribadosar, por súa parte, gañaron con solvencia tres dos catro cuartos ao Balonmán Culleredo, e xogaron despois o pase á fase final Ouro co Balonmán Beiramar Viveiro, con quen empataron o primeiro cuarto e a quen conseguiron superar nos tres cuartos seguintes. De venceren no Lalín Arena este sábado 1 de xuño ás 11 horas ao Asmubal Meaño B, os alevíns do clube compostelano competirán pola primeira posición absoluta desta categoría do balonmán galego nesta temporada 2023-2024.

 

O Ribadosar protagoniza o crecente interese pola práctica do balonmán en Compostela

Esta temporada 2023-2024, en que o Ribadosar estreaba ademais nova directiva, verificouse o aumento significativo do número de deportistas de Santiago e comarca inscritos na Federación Galega de Balonmán, xa que o clube santiagués pasou das 64 fichas federativas da temporada pasada ás 80 actuais. Este crecente interese polo balonmán verifícase tamén no éxito das xornadas de Portas Abertas que o Ribadosar celebra no Pavillón Quiroga Palacios de Conxo na última quincena de maio, onde máis unha ducia de rapaces e raparigas de Compostela se aproximaron por vez primeira do balonmán.

O clube informa que estas xornadas de Portas Abertas terán continuidade durante todo o mes de setembro, en que o persoal técnico do clube estará ademais ao dispor do profesorado de educación física dos centros de ensino de Santiago e comarca para a realización de obradoiros formativos de balonmán totalmente gratuitos en horario escolar.

 

Máis equipas femininas nas categorías de base e senior masculino para a próxima temporada

O Club Balonmán Ribadosar convida todas as persoas das Terras de Compostela interesadas neste deporte a asistiren ao Festival Fin de Temporada que terá lugar no Pavillón Quiroga Palacios de Conxo o próximo venres día 31 de 18:30h a 21h. Neste evento festivo será posíbel desfrutar de varios partidos de exhibición que enfrentarán tanto deportistas do Ribadosar entre si como deportistas cos seus familiares.

Igualmente, o Club Balonmán Ribadosar anima a deportistas de todas as idades a se inscreberen xa nas varias categorías en que pretende competir na temporada 2024-2025: benxamin e alevín misto, infantil e cadete masculino e feminino, xuvenil e senior masculino.

Toda a información sobre o Club Balonmán Ribadosar está accesíbel na web www.ribadosar.es, nas redes sociais desta asociación deportiva e no correo-e ribadosar@gmail.com