Final de temporada frenético no CB Ribadosar

 

Portas abertas entre 19 de maio e 28 de xuño, torneos en Compostela e Negreira 28 e 31 de maio, Final Four alevín 5 e proceso asemblear para a renovación da presidencia e xunta directiva do único clube de balonmán de Santiago de Compostela.

Concluída xa a competición das equipas senior, xuvenil e cadete masculinas, así como de benxamín mista, a afección do CB Ribadosar agarda o último partido da temporada na categoría infantil (masculina e feminina) e, sobretodo, o desempeño dos deportistas alevíns do único clube de balonmán da capital galega.

A equipa alevín do Ribadosar, invicta até a data, clasificouse con solvencia no pasado 17 de maio para a Final Four Alevín 5 que terá lugar no día 31 de maio no pavillón da Bombonera, en Redondela. Por segundo ano consecutivo, os rapaces adestrados por Laura Garabal gañaron por méritos propios o seu lugar entre a elite do balonmán galego e desputarán os catro primeiros postos co Arteixo, o Pontedeume e o Viveiro A. Precisamente contra esta última equipa competirá o Ribadosar no primeiro encontro, axendado para 31 de maio ás 10:45h.

Aínda no plano deportivo, a temporada 2024-2025 significou un avanzo considerábel no proceso de cohesión e de formación das categorías inferiores do CB Ribadosar. O magnífico traballo formativo do corpo técnico do clube trouxo consigo tanto o mellor desempeño do conxunto dos mais de 120 deportistas con ficha activa no Ribadosar, como a maior visibilidade e recoñecemento externo de varios/as deportistas do clube. Proba disto último é a convocatoria de Valle López Villar, do BM Ribadosar-Espina & Delfín para o adestramento coa selección galega infantil feminina no dia 11 de maio, ou a asistencia á xornada de tecnificación organizada pola Federación Galega de Balonmán en 18 de maio en Vilagarcia de Arousa dos deportistas alevíns Teitur Matynka Steinunnarson e Iván Vieites Marey.

Xornadas de Portas Abertas (Pavillón Quiroga Palacios, 19-27 de maio de 2025)

Un ano máis, o CB Ribadosar organiza as súas Xornadas de Portas Abertas en maio e setembro. Nesta ocasión, todas as crianzas que desexen experimentar se o balonmán é o seu deporte poden xa realizar a súa inscrición através deste formulario e adestrar así balonmán de maneira segura e gratuita no Pavillón Municipal Quiroga Palacios de Conxo (Rúa de Villaldía 33-35, Santiago de Compostela) nas tardes de 19 a 27 de maio deste ano 2025. Tamén poderán participar así no Festival do balonmán de Compostela que terá lugar no mesmo pavillón na tarde de 28 de maio de 18:30h a 21h. As portas do noso clube estarán novamente abertas durante todo o mes de setembro, todas as tardes despois das 18:30h no mesmo pavillón.

Toda a información sobre o procedemento de inscrición, a relación idades-categorías e os horarios dos adestramentos está accesíbel na web https://sites.google.com/site/ribadosar/deportistas > adestramentos).

Encontro das Escolas Deportivas Municipais

Despois do suceso do I Torneo Triangular Infantil do CB Ribadosar celebrado no Pavillón Quiroga Palacios o pasado 4 de abril, deportistas benxamíns e infantís do Ribadosar e das Escolas Deportivas Municipais dos concellos de Oroso, a Estrada e Negreira encontraranse novamente para desfrutar da práctica deste deporte, esta vez nas instalacións deportivas municipais de Negreira no día 31 de maio próximo.

Igualmente, as nenas do CB Ribadosar-Espina & Delfín que adestran un día por semana en Sigueiro asistirán á Gala do Deporte do Concello de Oroso no próximo 13 de xuño.

Aberto o proceso eleitoral do CB Ribadosar

Desde o día 23 de maio é posíbel apresentar candidaturas á presidencia do único clube de balonmán de Compostela. A renovación da xunta directiva do Ribadosar será efectiva na Asemblea Xeral Extraordinaria que terá lugar no próximo día 20 de xuño, na Casa das Asociación de Cornes, unha vez concluída a Asemblea Ordinaria de socios e socias axendada para as 18:30h en segunda convocatoria.

Carregue na imaxe ou nesta ligazón para escoitar a entrevista feita ao presidente do BM Ribadosar no programa radiofónico Ser Deportivos Santiago no día 20 de maio de 2025 (minutos 29-38). 

Calendario:

19/05-28/06: Portas Abertas do CB Ribadosar (Pavillón Quiroga Palacios, 18:30h-21h)

23/05: Reunión Aberta para a renovación da Xunta Directiva do CB Ribadosar (Casa das Asociacións de Cornes, 18:30h-20h)

23/05-30/05: Prazo de apresentación de candidaturas para a presidencia do CB Ribadosar

24/05: 12h: Infantil feminino: BM RIBADOSAR-ESPINA & DELFÍN vs BM. BRIGANTIUM NUNEGAL (Pavillón Quiroga Palacios)

25/05: 10:30h: Infantil masculino: COLEGIO LICEO LA PAZ vs BM RIBADOSAR (CPR Liceo La Paz, A Coruña)

28/05: Festival Final de Temporada (Pavillón Quiroga Palacios, 18:30h-21h)

31/05: Torneo Escolas Deportivas Municipais CB Ribadosar (Negreira)

31/05: Final Four alevín 5: Club Balonmán Viveiro A vs BM Ribadosar (Pavillón da Bombonera, Redondela, 10:45h)

31/05-05/06: Prazo de apresentación de alegacións á listaxe provisoria de candidaturas para a presidencia do CB Ribadosar

05/06: Convocatoria de Asemblea Xeral Ordinaria e Asemblea Xeral Extraordinaria do CB Ribadosar

13/06: Gala do Deporte do Concello de Oroso

20/05: Celebración das Asembleas Xeral Ordinaria e Extraordinaria do CB Ribadosar (Casa das Asociacións de Cornes, 18:30h-20:30h)

CONVOCATORIA DE ELECCIÓNS Á PRESIDENCIA DO CLUB BALONMÁN RIBADOSAR

 

Por causa da demisión por motivos estritamente persoais do actual presidente, e de acordo cos estatutos do Club Balonmán Ribadosar, son convocadas eleccións á presidencia do clube e renovación da Xunta Directiva.

O calendario desta convocatoria é o seguinte:

·       De 9:00h de 23 de maio a 20:00h de 30 de maio de 2025 estará aberto o prazo para a presentación de candidaturas.

Poderá apresentar candidatura á presidencia do CB Ribadosar calquera Socio/a Numerario/a con todos os pagamentos en día e con plena capacidade para obrar. Para iso é preciso cubrir o Anexo adxunto e envialo para o e-mail ribadosar@gmail.com antes das 20:00h de 30 de maio de 2025.

 

·       Antes das 20h do día 31 de maio será publicada na web do CB Ribadosar (www.ribadosar.es) a listaxe provisoria das candidaturas apresentadas. O prazo para eventuais reclamacións estará aberto até as 20:00h do día 5 de xuño.

 

·       No día 5 de xuño será convocada Asemblea Xeral Extraordinaria de socios/as do CB Ribadosar para o día 20 de xuño.

Esta asamblea extraordinaria para a elección do Presidente ou Presidenta do CB Ribadosar dará comezo no final da asamblea ordinaria convocada para a mesma data ás 18:30 horas en segunda convocatoria.

 

·       O día 6 de xuño será publicada na web do BM Ribadosar (www.ribadosar.es) a listaxe definitiva das candidaturas apresentadas.

En Santiago de Compostela, a 19 de maio de 2025.

 

Asinado: Marta Solla. Secretaria do CB Ribadosar

_______________________________________________________________

ANEXO

Apresento por este medio a miña candidatura para a Presidencia do Club Balonmán Ribadosar

 

 

Nome:

Apelidos:

DNI:

En Santiago de Compostela, a ____ de maio de 2025

Asinado

Descarrega aquí o anexo:

Solicitude de candidatura á presidencia do CB Ribadosar 2025

Iº Torneo Triangular Infantil do Club Balonmán Ribadosar

 Este venres, día 4 de abril, de 18:30h a 21:30h, no pavillón Quiroga Palacios de Santiago de Compostela terá lugar o primeiro Torneo Triangular Infantil organizado polo BM Ribadosar.

Esta xornada de deporte e convivio reunirá no pavillón do bairro santiagués de Conxo xogadores e xogadoras das categorías de base do BM Ribadosar con deportistas que iniciaron en setembro pasado a práctica do balonmán nas Escolas Deportivas Municipais da Estrada e de Negreira, ambas atendidas por adestradores do clube compostelano.

A xornada de balonmán comeza ás 18:30h con dous encontros de exibición entre equipas das categorías benxamín e alevín conformadas tanto por deportistas procedentes do BM Ribadosar como das Escolas Deportivas da Estrada e Negreira. Depois destes dous partidos terá lugar o Torneo Triangular Infantil e o evento concluirá con outro encontro de exibición que enfrentará as equipas cadete e a xuvenil do BM Ribadosar.

Exhibición
18:35h-19:05h BENXAMÍNS (balonmán 5)
19:10h-19:30h ALEVÍNS

Torneo triangular INFANTIL
19:35h-19:55h: infantil 1 vs infantil 2
20:00h-20:20h: infantil 1 vs infantil 3
20:25h-20:45h: infantil 2 vs Infantil 3

Exhibición
20:50h-21:20h CADETES vs XUVENÍS do CB Ribadosar

O Club Balonmán Ribadosar anima a toda a xente a asistir a este Iº Torneo Triangular Infantil e a se unir ao balonmán en Santiago e comarca.

Únete ao Ribadosar! Participa na consolidación e expansión deste proxecto deportivo e comunitario para Santiago e comarca.
Somos o balonmán en Compostela!

O BM Ribadosar dirixe as equipas de balonmán da USC no Campionato Galego Universitario de Deportes Colectivos

O triangular de balonmán celebrouse no día 12 de marzo no Pavillón do Campus de Elviña e nel a equipa masculina da USC conseguiu o primeiro lugar e a clasificación para o campionato estatal. A equipa feminina, por seu lado, ficou en segunda posición. Ambas estaban treinadas por adestradores do BM Ribadosar.

 

A Universidade da Coruña (UDC) acolleu nos días 12 e 13 de marzo as competicións de deportes colectivos do Campionato Galego Universitario 2025, que reuniu as seleccións universitarias galegas, masculinas e femininas, de fútbol, voleibol, balonmán, fútbol sala, rugby 7 y baloncesto. Na clasificación xeral por universidades a USC colocouse en cabeza deste Campionato ao atinxir 6 primeiros lugares nas 12 competicións desputadas.

 Na inicio da xornada de 12 de marzo, a competición de balonmán masculino enfrentou a equipa da USC, adestrada por Juan Carlos Lois Pastoriza (treinador do BM Ribadosar-USC), coa UDC. O encontro foi moi igualdado, como demostra que tanto a primeira metade como o partido concluísen en empate, toda a vez que a USC non conseguiu manter a avantaxe de 4 golos a que chegou no medio tempo da segunda parte. Resultado final de 22-22 e vitoria da UDC por 2 golos na quenda de 5 penaltis preceptiva no final de cada partido para resolver eventuais empates na clasificación final deste triangular.

O segundo partido enfrentou a UVigo coa USC, e concluiu con vitoria por 3 golos de diferenza (25-28) da equipa dirixida para a ocasión polo adestrador do sénior masculino do Club Balonmán Ridadosar. Xa a primeira metade tiña finalizado coa USC por diante no marcador (11-13) e, aínda que os vigueses conseguiron empatar o encontro durante a segunda parte, as contras e o acerto no tiro dos xogadores da USC fixeron a diferenza neste caso.

A vitoria da UVigo contra a UDC coloca a USC como gañadora do campionato galego en balonmán masculino e en condicións de desputar a fase final que será xogada en Madrid.

A equipa de balonmán feminino da USC, adestrada neste campionato por Enrique Iglesias Otero (treinador do BM Ribadosar-Casa da Eiriña), estreouse no campionato xogando tamén contra a UDC. Neste caso, a USC foi toda a primera parte por diante no marcador, chegando ao descanso con 2 golos de diferenza (12-14). Aínda que a USC errou varios lanzamentos desde 7m, o bon contraataque da equipa dirixida polo adestrador do conxunto xuvenil masculino do Club Balonmán Ribadosar mantivo o tempo todo no encontro as xogadoras compostelanas. Unha defensa máis asentada e agresiva, e o compromiso coa equipa das deportistas de Santiago, contribuiu para marcar unha diferenza de entre 3 e 4 golos ao longo da segunda parte, e para atinxir o resultado de 21-26 con que concluiu o encontro. A quenda de lanzamentos de 7m posteriores ao xogo finalizou cun empate a 4 golos no marcador, polo cal houbo recorrer á morte súbita, que caiu neste caso do lado da UDC.

O segundo encontro da equipa feminina da USC foi contra a UVigo e nel estaba en xogo o campionato destes xogos universitarios galegos. A UVigo saiu cunha defensa 3:3 que a USC conseguiu anular nos primeros momentos do encontro, mais algunhas perdas da posesión da bola e o xogo rápido das viguesas levou as deportistas olívicas a se afastaren moi rápido no marcador e chegaren ao descando cunha clara avantaxe de 18-8. A pesar do comezo esperanzador da USC na segunda parte, cando chegou a se colocar a 5 golos de empatar o encontro, a rapidez no xogo e os contraataques das viguesas voltaron afastar a UVigo no marcador até atinxiren o resultado de 38-14 con que concluiu o partido

 

 

Toda a información do único clube de balonmán de Santiago de Compostela está disponíbel através da nosa web, do noso blogue, das nosas redes sociais (facebook, Instagram e youtube) e do novo canal de whatsapp do BM Ribadosar.

Únete ao Ribadosar! Participa na consolidación e expansión deste proxecto deportivo e comunitario para Santiago e comarca.

Somos o balonmán en Compostela!