O Club Balonmán Ribadosar volta á actividade en setembro cun campamento no Pavillón do Restollal e as habituais Xornadas de Portas Abertas no Quiroga Palacios

 

O campamento do CB Ribadosar terá lugar no Pavillón do Restollal entre 1 e 5 de setembro, de 8:30h a 14h. As Portas Abertas e os adestramentos das equipas federadas comezan o día 8 de setembro no Pavillón Quiroga Palacios.

 

Co fin de promover a práctica do Balonmán e favorecer a conciliación familiar, o BM Ribadosar organiza un Campamento para nenos e nenas de entre 6 e 14 anos nas mañás da primeira semana de setembro. Entre os días 1 e 5 deste mes, no Pavillón do Restollal, dous adestradores do único clube de balonmán de Compostela, asistidos por cinco deportistas das categorías superiores do Ribadosar, achegarán o balonmán ás 21 nenas e nenos xa anotados nesta actividade neste momento. Quen aínda tiver interese en se inscribir pode consultar disponibilidade através do mail ribadosar@gmail.com.

🏟 Pavillón do Restollal. De 1 a 5 de setembro

⏰ entrada entre 8:30h e 9:00h, recollida entre 13:30h e 14:00h

 🎒material: roupa e calzado deportivo, merenda (haberá algo para acompañar), garrafa de auga.

💶 prezo: 55€ neno/a (persoas asociadas ao CB Ribadosar) ou 90€ neno/a (persoas NON asociadas ao CB Ribadosar).
 

Desconto de 10% para irmá(n)s.  

Como é habitual no clube compostelano, co inicio dos adestramentos das equipas federadas do Ribadosar comezan tamén as Xornadas de Portas Abertas no Pavillón Quiroga Palacios. Así, desde a tarde do día 8 e durante todo o mes de setembro será posíbel testar a práctica deste deporte de maneira totalmente segura e gratuita nas remodeladas instalacións de Conxo. O CB Ribadosar anima a crianzas e adolescentes de entre 6 e 16 anos a participaren nestas Xornadas de Portas Abertas, para o cal é necesario unicamente se inscribir através do formulario disponibilizado ao efeito na página de inicio da web www.ribadosar.es. Á espera de fixar os horarios de adestramento definitivos das sete equipas federadas con que conta o clube nesta temporada, na sección “Deportistas” do site www.ribadosar.es foron xa disponibilizados os horarios provisorios para as persoas que participen das Portas Abertas en inicios de setembro.

Toda a información sobre o Club Balonmán Ribadosar está accesíbel nas redes sociais do clube, na web www.ribadosar.es e no correo-e ribadosar@gmail.com.

Siga tamén o canal do Club Balonmán Ribadosar no WhatsApp: https://whatsapp.com/channel/0029VatPWkB77qVSvCoAzl2C

Ezequiel Álvarez Castro, novo presidente do Club Balonmán Ribadosar

 

A asemblea xeral extraoridinaria celebrade en 20 de xuño renovou a xunta directiva do único clube de balonmán da capital galega.

Ezequiel Álvarez Castro, directivo desde xuño de 2023, substitui Roberto Samartim na presidencia do CB Ribadosar. Este profesor na Facultade de Farmacia da Universidade de Santiago de Compostela (USC) asumiu os labores de coordenación da xunta directiva do clube compostelán na asemblea xeral extraordinaria celebrada na Casa das Asociacións de Cornes o pasado venres 20 de xuño, perante a nutrida representación da masa social do Ribadosar que aprobou por aclamación a súa candidatura, a única apresentada.

O novo presidente, dirixiuse ás persoas presentes para agradecer a confianza e afirmar a continuidade do traballo en común desenvolvido até agora no CB Ribadosar, para avanzar nos obxectivos estratéxicos fixados hai dous anos pola directiva sainte, nomeadamente na aposta por nutrir e reforzar as categorías base e pór en competición máis equipas femininas.

Na súa fala, Álvarez Castro apresentou a xunta directiva que dirixirá o CB Ribadosar nos próximos anos, unha equipa reforzada que, nas súas palabras, “conxuga a continuidade coa necesaria renovación”. Así, continúan facendo parte da directiva Marta Solla na secretaría do clube, Iago Suárez na tesouraría, Pepo Brea na coordenación deportiva e Maria Balboa na comunicación. Por seu lado, Paula Villar Casas remuda na vicepresidencia Patricia Rodríguez Botana, que deixa as súas responsabilidades xuntamente con Roberto Samartim e Félix Díaz López, presidente e vogal, respectivamente. A renovación e o reforzamento na xestión do Ribadosar evidenciase en que outras seis persoas terán agora responsabilidades na gobernanza do clube santiagués: Hipólito Gómez Couso (profesor da USC), María Botana Rocamonde (asesora na Confederación de Empresarios da Coruña), Manuel Xesús Romero Banzas (Técnico Superior de Prevención de Riscos Laborais), Rodrigo Gómez Ruiz (consultor estratéxico no sector sanitario), Eva Pintor Sánchez (profesora de Secundaria FP de Hostelaría e Turismo) e Obdulia García Nimo (profesora no IES Manuel García Barros da Estrada).

De esquerda a dereita, Ezequiel Álvarez (novo presidente), Roberto Samartim (presidente sainte)
e Ricardo Vázquez (presidente de 2014 a 2023)

Antes da asemblea extraordinaria en que foi renovada a presidencia e a xunta directiva do Club Balonmán Ribadosar, tivo lugar a asemblea xeral ordinaria do clube en que foron aprobadas por unanimidade as contas da temporada 2024-2025 e o orzamento para a próxima temporada 2025-2026. No informe do presidente saínte, Roberto Samartim destacou o crecemento do clube nos dous últimos anos, con avanzos mui significativos nos planos organizativo e deportivo, onde aumentou considerabelmente o número de persoas asociadas, de deportistas e de equipas postas en competición, incluindo ademais a xestión da sección de balonmán das Escolas Deportivas Municipais de Oroso, a Estrada e Negreira. No plano económico, por seu lado, foi destacada a sustentabilidade, a autonomía e a solvencia económica dun CB Ribadosar que vé como o seu orzamento anual medra progresivamente nos últimos anos, dos 44.000€ da temporada 2023-2024, aos 66.000€ da temporada 2024-2025, até os 70.000€ previstos para a próxima temporada 2025-2026. 

Algunhas das persoas que participaron nas asembleas do CB Ribadosar en 20 de xuño de 2025.

Na próxima temporada o CB Ribadosar prevé pór en competición sete equipas (benxamín e alevín mixta, infantil masculina, dúas equipas cadetes masculinas e unha feminina, e unha equipa senior masculina), aínda que tamén non descarta a posibilidade de unha equipa infantil feminina. Precisamente, co obxectivo de captar deportistas, reforzar as categorías base do clube e promover a conciliación familiar, foi anunciada a realización dun campamento deportivo de 1 a 5 de setembro para rapaces e raparigas de 6 a 14 anos no pavillón do Restollal, así como a continuidade dos obradoiros de balonmán nos centros de ensino de Santiago e comarca, e a celebración das xornadas de portas abertas do clube todas as tardes de setembro no Pavillón Quiroga Palacios de Conxo.

Toda a información sobre o Club Balonmán Ribadosar está accesíbel nas redes sociais do clube, na súa web (www.ribadosar.es) e no correo-e ribadosar@gmail.com.

Ven xogar connosco na temporada 2025-2026!

Realiza a preinscrición no Club Balonmán Ribadosar através deste formulario .